സാങ്കേതിക, ഡിജിറ്റൽ സർവകലാശാലകളിൽ താത്കാലിക വൈസ് ചാൻസിലർമാർക്ക് പുനർനിയമനം നൽകിയ ഗവർണർ നടപടി സുപ്രീം കോടതി വിധിയുടെ അന്തസത്തെ വെല്ലുവിളിക്കുന്നത്: എസ്എഫ്ഐ

സർവകലാശാലകളെ സംഘപരിവാർവൽക്കരിക്കുവാനും അസ്ഥിരപ്പെടുത്തുവാനും നിരന്തരം പരിശ്രമിച്ചുകൊണ്ടിരിക്കുന്ന കേരള ഗവർണർ ഭരണഘടനയെയും സുപ്രീംകോടതി വിധിയുടെ അന്തസത്തെയും വെല്ലുവിളിച്ചുകൊണ്ട് സാങ്കേതിക, ഡിജിറ്റൽ സർവകലാശാലകളിൽ കെ ശിവപ്രസാദിനെയും സിസ തോമസിനെയും താൽക്കാലിക വിസിമാരായി തുടർന്നും നിയമിച്ചിരിക്കുകയാണ്. ഭരണഘടന പദവിയിലിരിക്കുന്ന ഗവർണർ ഭരണഘടനയെ തന്നെ വെല്ലുവിളിക്കുകയും ഇന്ത്യൻ ഭരണഘടനയെ അംഗീകരിക്കാത്ത ആർഎസ്എസിന്റെ അടുക്കളയിലെ കുശിനിക്കാരനായി വേലയെടുക്കുകയുമാണ് ചെയ്തു കൊണ്ടിരിക്കുന്നത്.

ഹൈകോടതി ഡിവിഷൻ ബെഞ്ചിന്റെ ഉത്തരവ് ചോദ്യം ചെയ്ത് ഗവർണർ സുപ്രീം കോടതിയെ സമീപിച്ചതിനെ തുടർന്നുണ്ടായ കോടതി വിധിയിൽ ഊന്നൽ നൽകുന്നത് വിദ്യാർത്ഥികളുടെ ഭാവിക്ക് തടസ്സം ഉണ്ടാകുവാൻ പാടില്ല എന്നാണ്. സ്ഥിരം വി സി നിയമനം സർക്കാർ പാനൽ അനുസരിച്ച് കൊണ്ടാകണം എന്ന് പറയുന്നതിനോടൊപ്പം തത്കാലികമായി നിയമനമോ പുനർനിയമനമോ ചാൻസലർക്ക് നടത്താമെങ്കിലും രണ്ട് സർവകലാശാലകളിലെയും ചട്ടങ്ങൾക്ക് വിധേയമായി മാത്രമേ നിയമനം നടത്താൻ പാടുള്ളു എന്നും വ്യക്തമാക്കുന്നുണ്ട്. എന്നാൽ കെടിയു ആക്ട് 13 (7), ഡിജിറ്റൽ സർവ്വകലാശാല ആക്ട് 10( 11) പ്രകാരം സർക്കാർ ശുപാർശ പാലിക്കണം എന്ന ചട്ടങ്ങളെ അട്ടിമറിച്ചുകൊണ്ടാണ് ഗവർണർ പുനർനിയമനം നടത്തിയിരിക്കുന്നത്.

ALSO RAED: കേരള സർവകലാശാലയിലെ സിൻഡിക്കേറ്റ് ഹാളിലെ ഔദ്യോഗിക യോഗം അലങ്കോലപ്പെടുത്തുകയും സെക്യൂരിറ്റിയെ ആക്രമിക്കുകയും ചെയ്ത് കോൺഗ്രസ് സംഘടനാ പ്രവർത്തകർ ; കർശന നടപടിയുണ്ടാകുമെന്ന് സിൻഡിക്കേറ്റ്

സാങ്കേതിക, ഡിജിറ്റൽ സർവകലാശാലകളിൽ നിരവധിയായ വിദ്യാർത്ഥി വിഷയങ്ങളാണ് നിലനിൽക്കുന്നത്. തുടർച്ചയായി വിദ്യാർത്ഥി വിരുദ്ധ നിലപാടുകൾ സ്വീകരിച്ചുകൊണ്ടാണ് ഗവർണർ പുനർനിയമനം നടത്തിയിരിക്കുന്ന വൈസ് ചാൻസിലർമാർ മുന്നോട്ടു പോയിക്കൊണ്ടിരുന്നത്. തുടർന്നും ഇവരെ തന്നെ വി സി മാരായി നിയമിച്ചത് സുപ്രീംകോടതി വിധിയെ അപമാനിക്കുന്നതിനോടൊപ്പം വിദ്യാർത്ഥി വിരുദ്ധവും അത്യന്തം പ്രതിഷേധാർഹവുമാണ്. ഗവർണറുടെ ഭരണഘടനാ വിരുദ്ധമായ നിലപാടിനെതിരെ ശക്തമായ സമരപ്രക്ഷോഭങ്ങൾക്ക് എസ്എഫ്ഐ നേതൃത്വം നൽകും. സുപ്രീംകോടതി വിധി പൂർണ്ണമായും പാലിച്ച് പുനർനിയമനം റദ്ദ് ചെയ്തു കൊണ്ട് സാങ്കേതിക ഡിജിറ്റൽ സർവകലാശാലകളിൽ അടിയന്തരമായി സ്ഥിരം വൈസ് ചാൻസലർമാരെ നിയമിക്കണമെന്നും അല്ലാത്തപക്ഷം ജനാധിപത്യ അവകാശത്തിന്റെ മുദ്രാവാക്യങ്ങൾ ഉയർത്തിപ്പിടിച്ചുകൊണ്ട് ശക്തമായ വിദ്യാർത്ഥി പ്രക്ഷോഭങ്ങൾ ഉയർത്തുമെന്നും എസ്എഫ്ഐ സംസ്ഥാന സെക്രട്ടറി പി എസ് സഞ്ജീവ് പ്രസിഡന്റ് എം ശിവപ്രസാദ് എന്നിവർ പ്രസ്താവനയിലൂടെ അറിയിച്ചു.

The post സാങ്കേതിക, ഡിജിറ്റൽ സർവകലാശാലകളിൽ താത്കാലിക വൈസ് ചാൻസിലർമാർക്ക് പുനർനിയമനം നൽകിയ ഗവർണർ നടപടി സുപ്രീം കോടതി വിധിയുടെ അന്തസത്തെ വെല്ലുവിളിക്കുന്നത്: എസ്എഫ്ഐ appeared first on Kairali News | Kairali News Live.

കടപ്പാട് :Kairali News | Kairali News Live https://ift.tt/wx3k0Us